Alfa & Omega - La Usc di Ladins

29 de messel 2019

N conzert fora de anter: dal scomenz a la fin

Gran aprijiament per l nef projet portà dant chest istà da l’Ensemble Canticum Novum sot la vida del maester Ilario Defrancesco

La gran gejia era jà belebon piena de jent en jebia ai 18 de messèl pech inant les 9 da sera, canche i ciantores regolé con sie bel guant i se à spartì fora ju per duta la navèdes te anter i benc, domanan mìngol de lèrga per se sentèr jù.

Chi che cognosc l’Ensemble Canticum Novum i sà che l maester Ilario Defrancesco l rencura semper delvers ence l’aspet scenografich, che garata no demò per la parbuda, ma ence per l’acustica, a na vida che la jent vegne fata ite patoch da la oujes.

E apontin chest l’é sozedù canche i ciantores, levan sù un dò l’auter sa sie banch, i à entonà »Veni Emmanuel«, su la veiora melodia del XIII secol elaborèda dal Maester del Gide.

L’é scomenzà coscì n conzert dassen particolèr, che la corala l’à enjignà con gran empegn e fadìa ti meisc passé, emparan i toc beleche duc neves, e l’à cernù de l prejentèr per la pruma outa ben segur te la gejia “mère” del Canticum, chela de Sèn Vile a Moena, tel chèder de la rassegna »Ispirazions d’istà«.

Alfa e Omega. Gé son l scomenz e la fin. L’é chest l titol de program deldut nef, particolèr e desferent respet ai etres conzerc, che Ilario Defrancesco à studià fora per portèr dant, enterzan cianties de stii e tempes storics desferenc a la ousc de n narator, l’event che più che ogne auter à segnà la storia de l’umanità: la vita e l messaje de Gejù Crist.

Da l’Anunziazion, con »Angel dal ciel disceso«, n toch del XVI secol de Giovanni Giovenale Ancina, a la nasciuda del Bambin, con la »Nenia di Gesù Bambino« de Luigi Pigarelli con test piemonteis, prejenté da toc de schertures sacrèles letes da Luca Follador, e dapò la lejenda de la corona de reses sun musega de Tchaikovsky per ingleis e amò na interpretazion straordenèra per ebraich de »Mizmor LeDavid«, l Salm 22 (23) sul Segnoredie mie pèster, e amò inant con etres toc per talian, franzous e latin, per ruèr a n auter toch de gran intensità, l’invocazion del Segnoredie al Père »Eli!Eli!«, te la verscion del componist unghereis del XX secol György Deák-Bárdos, e dapò semper con musega contemporana de gran efet »O Crux Ave« de Rihards Dubra per ruèr a la legreza de la Pèsca per l Crist ressorì. 

L conzert, viventà dai movimenc di ciantores te la gejia e da la scenes interpretèdes da doi joenec regolé de bianch, Sara e Andrea, se à serà sù con na ciantia dassen particolèra e de gran segnificat, pissèda da Ilario Defrancesco, olache i ciantores à enterzà doi toc desferenc, »Veni Sancte Spiritus« e »Adoro te devote« luré fora dal gregorian dal Maester, per portèr dant tel medemo temp i doi gregn dons che Gejù ne à lascià: l Spirit Sènt e l’Eucarestìa. 

I gregn batiman e ence la standing ovation de duta la jent che à empienì la gejia à confermà che chest projet ambizious e particolèr de l’Ensemble Canticum Novum, che l’an passà à festejà i 25 egn de atività, l’à dassen garatà e l’à entusiasmà l publich. 

L vegnarà prejentà via per chest istà amò 4 outes: en jebia prum de aost a Ègort, ai 8 de aost endò a Moena, en lunesc ai 12 a Ciastel de Fiem, en domenia ai 18 fora Juan e en mercol ai 28 de aost te gejia de Pera.

Lucia Gross