N in d’amor ciantà per la natura

N in al bel e a la marevees de dut chel che aon dintorn, portà dant travers museghes de stii, lengac e tempes desvalives, ciolé ensema da na narazion scrita aposta per menèr chi che scouta sun n percors che rejona dret a sia esperienza vivuda.

L nef projet de l’Ensemble Canticum Novum se à concretisà en domenia ai 28 de aost con n bel conzert sun Penia de Moena. N conzert emportant, coche à sotrissà al scomenz l aester Ilario Defran casco, percheche l’é stat l prum che la corala à portà dant a l’averta e percheche l’é ruà dò 20 meisc che i ciantores no se prejentèa più dedant al publich, a cajon de la pandemia.

L’é la natura, chela natura tant proèda da la man de l’om, dai mudamenc del clima, dai evenc destrutives desche l tormen Vaia, la protagonista de chest projet, che vel envièr la jent a  e fermèr ogne tant n moment per vardèr, scutèr, pissèr a dut chel che l’ambient da marevea che aon entornvia l vel ne dir e l pel ne ensegnèr.

L conzert pea via con n toch svedeis de gran sugestion, Joik, per dapò jir ite tel tem che à ispirà dut l projet, l Cantico de la creatures de Sèn Franzesch da Assisi, n in a la beleza di elemenc de la natura e a sie Creator, metù en musega per l’ocajion dal medemo maester del Cor e compositor Ilario Defrancesco.

L percors se dejouc dapò con cianties per ingleis e per talian antich, cianties tradizionèles e autres de autor, enterzèdes da la narazion de Luca Follador che tolan ispirazion dai tesć de la cianties, vèlch outa les antizipan, autra outes les comentan, ne mena travers momenc e emozions de la vita de l’om e de la natura.

Tòc che soscedea la emozions universèles de l’amor, de l’encresciujum per l passà, tocian più outes la dimenscion sacra per dapò ruèr a la musega etnica de desvaliva cultures, te cheles che la natura à semper abù na pèrt zentrèla per la vita de l’om. Anter chestes ence doi cianties per ladin: ‘Luna’ e ‘Scoita l’èga ciantar’, duta does con musega del maester Ilario Defrancesco sun test de Stefen Dell’Antonio Monech.

N conzert dassen aprijià dal publich che, enceben n tempram no proprio ciaut, l se à godù fin en ultima i sons e la oujes che se slarièa fora te mez a na natura che moscèa duta sia beleza, ma ence sia ferides coi èlbres crodé, per ne recordèr che la é scherpenta e delicata, envian l’om a l’atenzion e al respet.

Defat l’Ensemble Canticum Novum à recordà che con chest program l vel dèr sie contribut per sensibilisèr l publich envers chisc temes travers l ciantèr e fèr aprijièr amò de più l contat con la natura desche simbol maraveous de rena sciment.

Dò l conzert de Moena, la corala portarà dant sie nef projet ence en domenia ai 19 de setember da les 5 domesdì ti pré aló da la gejia de San Valier a Ciavaleis, en cajo de burt temp l sarà te la Pieif de Ciavaleis l medemo dì da les 9 da sera.

Leggi l'articolo in PDF